বিবাহৰ দুবছৰতে ভাল খবৰ দিলে কিয়াৰা-সিদ্ধাৰ্থে!

বলীউডৰ জনপ্ৰিয় দম্পতী কিয়াৰা আদৱানী আৰু সিদ্ধাৰ্থ মালহোত্রাই দিলে সুখবৰ! প্ৰথম সন্তানৰ পিতৃ-মাতৃৰ গৌৰৱ অৰ্জন কৰিবলৈ গৈ আছে দুয়ো। ২৮ ফেব্ৰুৱাৰীত ইনষ্টাগ্ৰামত এটা হৃদয়স্পৰ্শী পোষ্টৰ জৰিয়তে তেওঁলোকে এই শুভ বাৰ্তা জনায়। ছবিখনত তেওঁলোকক এটা শিশুৰ মোজা ধৰি থকা দেখা যায়, য’ত শিৰোনাম হিচাপে লিখা আছিল, “আমাৰ জীৱনৰ আটাইতকৈ ডাঙৰ উপহাৰ। শীঘ্ৰেই আহি আছে।”

এই ঘোষণাৰ পিছতেই অনুৰাগী আৰু বলীউডৰ বহুতো অভিনেতা-অভিনেত্ৰীৰ পৰা শুভেচ্ছাৰ বন্যা বৈ যায়। অভিনেত্ৰী হুমা কুৰেশ্বীয়ে মন্তব্য কৰে, “ওহ মাই গড! অভিনন্দন,” আৰু নেহা ধুপিয়াইও আন্তৰিক শুভেচ্ছা জনায়। অনুৰাগীসকলেও উৎসাহ দৰ্শাই লিখিছে, “সৰ্বশ্ৰেষ্ঠ মা আৰু দেউতা হ’ব,” ,”সন্তানটোৰ বাবে অধীৰ অপেক্ষা কৰিছোঁ,” ।

ঘোষণাৰ পিছত, কিয়াৰাই মুম্বাইত প্ৰথমবাৰৰ বাবে অনুৰাগীৰ ওচৰত উপস্থিত হয়। সৰল, কিন্তু আধুনিক পোছাক পৰিধানেৰে তেওঁ পাপাৰাজ্জিৰ শুভেচ্ছা সৌজন্যৰে গ্ৰহণ কৰে আৰু তেওঁৰ মুখত মাতৃত্বৰ আনন্দৰ উজ্জ্বলতা জিলিকি উঠে।

কিয়াৰা আৰু সিদ্ধাৰ্থৰ প্ৰেমকাহিনী ২০২১ চনত মুক্তি পোৱা “শ্বেৰশ্বাহ” চিনেমাৰ ছেটত আৰম্ভ হৈছিল। এই ছবিখনত সিদ্ধাৰ্থে কেপ্টেইন বিক্ৰম বাত্ৰাৰ ভূমিকাত অভিনয় কৰিছিল আৰু কিয়াৰাই তেওঁৰ প্ৰেমিকা ডিম্পল চীমাৰ চৰিত্ৰত অভিনয় কৰিছিল। ছবিখনৰ শ্বুটিঙৰ সময়তে দুয়োৰে মাজত গভীৰ সম্পৰ্ক গঢ়ি উঠে আৰু ২০২৩ চনৰ ফেব্ৰুৱাৰীত তেওঁলোক বিবাহপাশত আবদ্ধ হয়।

এতিয়া, তেওঁলোকে নিজৰ জীৱনৰ এই নতুন পৰ্যায় আৰম্ভ কৰিছে। অনুৰাগী তথা পৰিয়ালৰ সকলোৰে পৰা তেওঁলোকে অবিৰত আশীৰ্বাদ আৰু শুভেচ্ছা লাভ কৰি আছে। সকলোৱে আগ্ৰহেৰে অপেক্ষা কৰি আছে কিয়াৰা আৰু সিদ্ধাৰ্থৰ কোলাত নতুন অতিথিৰ আগমনৰ শুভ খবৰৰ বাবে।