অসমীয়া চলচ্চিত্ৰৰ জনপ্ৰিয় অভিনেতা অৰ্ঘদীপ বৰুৱাৰ সাক্ষাৎকাৰ

মনোমোহা অভিনয়ৰ বাবে পৰিচিত অসমীয়া চিনেমাৰ উদীয়মান তাৰকা অৰ্ঘদীপ বৰুৱা। যিয়ে ছবিৰ ধাৰাবাহিকতাৰে হৃদয় আৰু সমালোচকৰ প্ৰশংসা লাভ কৰি অসমীয়া চলচ্চিত্ৰ জগতৰ এজন আগশাৰীৰ অভিনেতা হিচাপে নিজৰ স্থান দৃঢ় কৰি তুলিবলৈ সক্ষম হৈছে তেখেতৰ সৈতে এটি সাক্ষাৎকাৰ গ্ৰহণ কৰা হয়৷

প্ৰবালঃ

দাদা আপোনাক অসমীয়া চিনেমাৰ সফল কেৰিয়াৰৰ বাবে অভিনন্দন। আপোনাৰ শৈশৱৰ বিষয়ে আৰু অভিনয়ৰ প্ৰতি কেনেদৰে আগ্ৰহ গঢ় লৈ উঠিছিল সেই বিষয়ে অলপ কব পাৰিবনে?

অৰ্ঘদীপ বৰুৱাঃ

ধন্যবাদ প্ৰবাল! এই প্ৰশ্নৰ উত্তৰ যদি সঁচাকৈ দিওঁ তেন্তে ক’ব লাগিব যে মই যোগাযোগ আৰু সাংবাদিকতা বিভাগৰ ছাত্ৰ আছিলোঁ, আৰু চলচ্চিত্ৰ অধ্যয়ন সদায় মোৰ প্ৰিয় বিষয়বোৰৰ ভিতৰত এটা আছিল। মোৰ কেৰিয়াৰ গঢ় দিয়াত এই ক্ষেত্ৰখনে উল্লেখযোগ্য ভূমিকা পালন কৰিছে। অৱশ্যে মোৰ অভিনয়ৰ যাত্ৰা একেবাৰে আকস্মিক আছিল— মই কেতিয়াও চিনেমাৰ জগতখনত প্ৰৱেশ কৰাৰ পৰিকল্পনা কৰা নাছিলোঁ।

সকলো আৰম্ভ হৈছিল যেতিয়া কাদম্বৰী কাশ্যপে মোক শংকুৰাজ কোঁৱৰৰ জনপ্ৰিয় গীতত অভিনয় কৰাৰ সুযোগ দিছিল। সেইবাবেই ভাস্কৰ হাজৰিকাৰ পৰিচালক “আমিষ” ছবিখনত মোৰ কাষ্টিং হ’ল। “আমিষ”ৰ পিছত ক্ৰমান্বয়ে অধিক চলচ্চিত্ৰৰ সুযোগ পালোঁ আৰু অভিনয়ৰ জগতখনৰ সৈতে পৰিচিত হ’লোঁ। এতিয়াও মই নিজকে এজন শিকাৰু বুলি গণ্য কৰোঁ আৰু প্ৰতিটো প্ৰজেক্টৰ লগে লগে উন্নতি কৰিবলৈ চেষ্টা কৰো।

প্ৰবালঃ

আপুনি ক’ত ডাঙৰ-দীঘল হৈছিল আৰু আপোনাৰ লালন-পালনে অভিনয়ৰ ক্ষেত্ৰত কেৰিয়াৰ গঢ়ি তোলাৰ সিদ্ধান্তক কেনেদৰে প্ৰভাৱিত কৰিছিল?

অৰ্ঘদীপ বৰুৱাঃ

ব্ৰহ্মপুত্ৰ নদীৰ পাৰৰ ধুবুৰী জিলাৰ গৌৰীপুৰত ডাঙৰ হৈছো। মোৰ প্ৰাৰম্ভিক শিক্ষাও তাতেই আৰম্ভ হৈছিল। সৰুৰে পৰাই মোক আগুৰি আছিল সংগীত আৰু পৰিবেশন কলাৰ চহকী পৰিৱেশ। এনে সাংস্কৃতিকভাৱে সজীৱ পটভূমিৰ পৰা আহি মোৰ স্বাভাৱিকতে কলাৰ প্ৰতি এক আত্মীয়তা গঢ় লৈ উঠিছিল।

প্ৰবালঃ

আপোনাৰ প্ৰিয় ছবি কেইখন কি কি আছিল আৰু কোন গৰাকী অভিনেতা ৰ অভিনয় শৈলীয়ে আপোনাক অভিনেতা হ’বলৈ প্ৰেৰণা দিছিল?

অৰ্ঘদীপ বৰুৱাঃ

যদি মই বলীউডৰ অভিনেতাৰ নাম ল’ব লগা হয় তেন্তে সেয়া হ’ব ইৰফান খান। “দ্য লাঞ্চবক্স”ত তেওঁৰ অভিনয়ে মোৰ মনত স্থায়ী ছাপ পেলাইছিল আৰু মোক বহুত অনুপ্ৰাণিত কৰিছিল।

অসমীয়া চিনেমাৰ পৰা অৰুণাভ শৰ্মা ছাৰে ডাঙৰ প্ৰভাৱ পেলাইছে। তেওঁ নিজৰ ভূমিকাসমূহৰ বাবে যিদৰে প্ৰস্তুতি চলায়, তাৰ মই প্ৰশংসা কৰো। তেওঁৰ সৈতে কাম কৰাৰ সৌভাগ্য হৈছিল, যিটো আছিল এক অবিশ্বাস্য শিক্ষণ অভিজ্ঞতা। ইয়াৰ উপৰিও শেহতীয়াকৈ আদিল হুছেইন ছাৰৰ সৈতে কথা-বতৰা হৈছিল, যিটো যথেষ্ট প্ৰেৰণাদায়ক আছিল। এনে পাৰস্পৰিক ক্ৰিয়াই মোক সদায় মোৰ কলাক উন্নত কৰিবলৈ প্ৰেৰণা দিয়ে।

আৰু, অৱশ্যেই, মোৰ সহ-অভিনেত্ৰী লিমা দাসৰ কথা উল্লেখ কৰিব লাগিব, যিগৰাকীয়ে অহৰহ সমৰ্থন আৰু প্ৰেৰণাৰ উৎস হৈ আহিছে।

প্ৰবালঃ

চলচ্চিত্ৰ উদ্যোগটোৰ আন অভিনেতাসকলৰ পৰা আপোনাক কিহৰ বাবে পৃথক বুলি ভাবে?

অৰ্ঘদীপ বৰুৱাঃ

মোৰ বিশ্বাস প্ৰতিজন শিল্পীৰ নিজস্ব সুকীয়া শৈলী থাকে। সকলো অভিনেতাৰ দৰে মইও পৰিচালকৰ দৃষ্টিভংগী বুজিবলৈ চেষ্টা কৰোঁ আৰু সেই অনুসৰি ডেলিভাৰী দিবলৈ চেষ্টা কৰোঁ। কিন্তু যোগাযোগ আৰু সাংবাদিকতা অধ্যয়ন কৰি পিছলৈ মই চলচ্চিত্ৰ নিৰ্মাণৰ ফেল’শ্বিপ লাভ কৰিলোঁ, বিশেষকৈ বন্যপ্ৰাণী আৰু সম্প্ৰদায়ভিত্তিক চলচ্চিত্ৰ নিৰ্মাণৰ ওপৰত গুৰুত্ব আৰোপ কৰিলোঁ। এই অভিজ্ঞতাই মোক চিনেমাট’গ্ৰাফী আৰু সম্পাদনাকে ধৰি চিনেমাৰ বিভিন্ন দিশৰ অন্তৰ্দৃষ্টি প্ৰদান কৰিলে। ই কেতিয়াবা প্ৰত্যাহ্বানৰ সৃষ্টি কৰিলেও মই ইয়াক সীমাবদ্ধতাতকৈ সুবিধা বুলি গণ্য কৰোঁ।

বাস্তৱঃ

আজৰি সময়ত কি কৰি ভাল পায়? অভিনয়ৰ বাহিৰেও আপোনাৰ কিবা চখ বা আগ্ৰহ আছেনে?

অৰ্ঘদীপ বৰুৱাঃ

অভিনয়ৰ উপৰিও গান গাই, সংগীত নিৰ্মাণ কৰি ভাল পাওঁ। যদি মই নিজৰ পৰিচয় বেলেগ ধৰণে দিওঁ তেন্তে সংগীতজ্ঞ হিচাপে পৰিচিত হ’লে ভাল পাম। তথ্যচিত্ৰ নিৰ্মাণৰ প্ৰতিও মোৰ গভীৰ আগ্ৰহ আছে।

প্ৰবালঃ

আপোনাৰ অভিনয় জীৱনৰ কিছু ৰঙীন মূহুৰ্ত আমাৰ মাধ্যমেৰে প্ৰকাশ কৰিবলৈ বিচাৰে নেকি?

অৰ্ঘদীপ বৰুৱাঃ

বহু স্মৰণীয় মুহূৰ্ত আছে! “আমিষ”ৰ কামৰ সমগ্ৰ যাত্ৰাটো বিশেষ আছিল, বিশেষকৈ প্ৰস্তুতিৰ অংশ হিচাপে আমি কৰা কৰ্মশালাবোৰ।

আন এক আদৰৰ স্মৃতি হ’ল মোৰ বেণ্ড “গৰখিয়া”ত কেমেৰাপাৰ্চন পাম্পু দাসৰ পৰিচালনাত এটা মিউজিক ভিডিঅ’ নিৰ্মাণৰ কামৰ অভিজ্ঞতাটো সঁচাকৈয়ে স্মৰণিয় আছিল।

বাস্তৱঃ

যিসকলে নতুনকৈ অভিনয়ৰ পথাৰ খনত বীজ সিঁচিব বিচাৰে সেই উত্তৰাধিকাৰী সকলক আপুনি কি পৰামৰ্শ দিব?

অৰ্ঘদীপ বৰুৱাঃ

মই পৰামৰ্শ দিব পৰা অৱস্থাত নাই বুলি ভাবো, কিয়নো মই এতিয়াও নিজেই শিকি আছো। অৱশ্যে এটা কথা ক’ব পাৰো যে শিকাৰ হেঁপাহ কেতিয়াও ম্লান হ’ব নালাগে। নিজৰ প্ৰতি সচেতন হৈ থকা আৰু অহৰহ উন্নতি কৰাটো অতি প্ৰয়োজনীয়। তেতিয়াহে সঁচা অৰ্থত অভিনয় কলাৰ মাজত নিজকে বিলীন কৰিব পাৰিব।

প্ৰবালঃ

যেনেদৰে আপোনাৰ অভিনয় শৈলীয়ে দৰ্শকক আপ্লুত কৰিবলৈ সক্ষম হৈছিল তেনেদৰে সংগীত ক্ষেত্ৰখনতো আপোনাৰ বিশেষ পৰিকল্পনা আছে নেকি?

অৰ্ঘদীপ বৰুৱাঃ

হয়! শেহতীয়াকৈ “প্ৰতিদিন” নামৰ এটা গীত মুকলি কৰিলোঁ, আৰু এইবাৰ আন এটা গীত মুকলি কৰাৰ পৰিকল্পনা কৰিছো। মোৰ এটা ডাঙৰ লক্ষ্য হৈছে মোৰ সংগীত বেণ্ডটোক আৰু অধিক বিকশিত কৰা আৰু আমাৰ দৰ্শকৰ সৈতে অধিক গভীৰভাৱে সংযোগ স্থাপন কৰা।

বাস্তৱঃ

ভৱিষ্যতে আপোনাৰ ভ্ৰাম্যমাণৰ মঞ্চলৈ অহাৰ পৰিকল্পনা আছে নেকি?

অৰ্ঘদীপ বৰুৱাঃ

প্ৰতিজন অভিনেতাই মোবাইল থিয়েটাৰত অভিনয় কৰাৰ সপোন দেখে। বৰ্তমান মই মোৰ কলাক পৰিশোধন কৰাৰ কাম কৰি আছো, আৰু এবাৰ সাজু অনুভৱ কৰিলে মই নিশ্চিতভাৱে বিবেচনা কৰিম।

বাস্তৱঃ

আপোনাৰ ছবি “সেউজ সন্ধান” আমাৰ জোনাকী চলচ্চিত্ৰ মহোৎসৱত প্ৰদৰ্শিত হ’ব। এইবাৰৰ চলচ্চিত্ৰ মহোৎসৱৰ বিষয়বস্তু হৈছে “প্ৰকৃতি আৰু জলবায়ু পৰিৱৰ্তন”। এই বিষয়ে আপুনি কি মন্তব্য আগবঢ়াব

অৰ্ঘদীপ বৰুৱাঃ

মই সঁচাকৈয়ে সুখী যে গৌহাটী বিশ্ববিদ্যালয়ৰ যোগাযোগ আৰু সাংবাদিকতা বিভাগে তৃতীয়বাৰৰ বাবে জোনাকী চলচ্চিত্ৰ মহোৎসৱৰ আয়োজন কৰিছে। তাত “সেউজ সন্ধান” প্ৰদৰ্শিত হ’ব বুলিও মই আনন্দিত।

প্ৰকৃতি আৰু জলবায়ু পৰিৱৰ্তনৰ বিষয়বস্তু অবিশ্বাস্যভাৱে গুৰুত্বপূৰ্ণ। আমাৰ চৌপাশ ঘটি থকা ধ্বংসলীলাৰ ওপৰত আমি চিন্তা-চৰ্চা কৰিব লাগিব আৰু আমাৰ পৰিৱেশ সুৰক্ষিত কৰাৰ উপায় বিচাৰি উলিয়াব লাগিব। যিহেতু গুৱাহাটীৰ সমীপৰ এক গুৰুত্বপূৰ্ণ জলাশয় দীপৰ বিল তীব্ৰ ভাবুকিৰ সন্মুখীন হৈছে, সেয়েহে এনে বিষয়ক কেন্দ্ৰ কৰি আলোচনা কৰাটো অতি গুৰুত্বপূৰ্ণ।

প্ৰবালঃ

ধন্যবাদ দাদা ৷ বহুমূলীয়া সময় আমাক দিয়াৰ বাবে আপোনাক ধন্যবাদ জনাইছোঁ৷ যোগাযোগ আৰু সাংবাদিকতা বিভাগ ৰ তৰফৰ পৰা কৃতজ্ঞতা জ্ঞাপন কৰি আপোনাৰ ভৱিষ্যত পৰিকল্পনাসমূহৰ বাবে শুভেচ্ছা জ্ঞাপন কৰাৰ লগতে আপোনাৰ সুস্বাস্থ্য কামনা কৰিলোঁ

সাক্ষাৎগ্ৰহণঃ
প্ৰবাল জ্যোতি শৰ্মা আৰু বাস্তৱ কুমাৰ বৰুৱা
যোগাযোগ আৰু সাংবাদিকতা বিভাগ, গুৱাহাটী বিশ্ববিদ্যালয়ৰ